އުނގޫފާރުގައި ހުރި ދައުލަތާއި ސަރުކާރުގެ މުއައްސަސާކާއި ކުންފުނިތައް ގުޅިގެން މުއައްސަސާތަކުގެ މެދުގައި ފުޓްސަލް މުބާރާތަކާއި ހޭންޑް ބޯޅަ މުބާރާތެއް ބާއްވަން ނިންމައި އެކަމުގެ ތައްޔާރީތައް ވަމުން އެބަދެއެވެ.
މުއައްސަސާތަކުގެ މެދުގައި ކުރިއަށްދާ މިމުބާރާތް މިފަހަރު އިންތިޒާމްކޮށް ކުރިއަށް ގެންދިއުމުގައި އިސްކޮށް މަސައްކަތް ކުރައްވާ އެއްފަރާތް ކަމުގައި އަހުމަދު ރިޒްވީން (އުނގޫފާރު ޕޮލިސް) މިމުބާރާތުގެ ކަންކަން ކުރިއަށްދާގޮތް ހިއްސާކުރައްވަމުން ވިދާޅުވީ މުބާރާތުގެ ހުރިހައި ތައްޔާރީތަކެއްވެސް ވަރަށްފޯރީގައި ކުރިއަށް ދާކަމަށެވެ. އަދި ކަނޑައެޅިފައިވާ ތާރީހް ކަމަށްވާ 27 ޖުލައި އަށް ހުރިހައި ކަމެއްވެސް ނިންމާލެވޭނެކަމަށް ރިޒްވީން ވިދާޅުވިއެވެ.
“ބަދަހި ވާދަ” ގައި 2 މުބާރާތެއް ކުރިއަށް ދާނެއެވެ. އެއީ މުއައްސަސާތަކުގެ ފިރިހެން މުވައްޒަވުންގެ މެދުގައި ކުރިއަށްދާ ފުޓްސަލް މުބާރާތަކާއި އަންހެން މުވައްޒަފުންގެ މެދުގައި ކުރިއަށްދާ ހޭންޑް ބޯލް މުބާރާތެކެވެ.
ފުޓްސަލްގައި 8 ޓީމް ވަނީ ބައިވެރި ވެފައެވެ. އެއީ އުނގޫފާރު ރީޖަނަލް ހޮސްޕިޓަލްގެ ފަރާތުން ވާދަކުރާ 3 ޓީމާއި، އުނގޫފާރު ޕޮލިސްގެ ފަރާތުން ވާދަކުރާ 2 ޓީމާއި ރ އަތޮޅު ކައުންސިލްގެ 1 ޓީމާއި ފެނަކަ އަދި އުނގޫފާރު ކައުންސިލް ގުޅިގެން 1 ޓީމް އަދި ބެންކް، މީރާ، މެޖިސްޓްރޭޓް ކޯޓް، އެމްޓީސީސީ، އިސްލާމިކް ސެންޓްރ އަދި ސްކޫލް ގުޅިގެން 1 ޓީމެއެވެ.
ހޭންޑް ބޯލް މުބާރާތުގައި 5 ޓީމު ވާދަކުރާނެއެވެ. އެއީ ޕޮލިސް، އުނގޫފާރު ރީޖަނަލް ހޮސްޕިޓަލް، އުގޫފާރު ސްކޫލް، ރ އަތޮޅު ކައުންސިލް އަދި އުނގޫފާރު ކައުންސިލްގެ ކޮމްބައިން ޓީމެވެ.
މިފަދަ މުބާރާތެއް ބޭއްވުމުގެ މަޤްސަދަކީ މުއައްސަސާތަކުގެ ދެމެދުގައި ކުޅިވަރުގެ ހޫރުއާލާކޮށް ދިރުވުމާއި މުވައްޒަފުންގެ މެދުގައި ދުޅަހެޔޮ މަސައްކަތު މާހަލުއެއް ޤާއިމުކުރުމެވެ.
މިމުބާރާތްތައް ފެށުމަށް ހަމަޖެހިފައިވަނީ 27 ޖުލައި 2024 ވާ ހޮނިހިރު ދުވަހުއެވެ. މުބާރާތުގެ މެޗްތައް ކުޅުމަށް ހަމަޖެހިފައިވަނީ އުނގޫފާރު ކޮމިއުނިޓީ ސެންޓަރުގެ ފުޓްސަލް ދަނޑުގައެވެ.