އިންޑޮނޭޝިއާއަށް މިއަދު ބާރުގަދަ ބިންހެލުމެއް އައިސް 160 އަށް ވުރެ ގިނަ މީހުން މަރުވެ އެތައް ބަޔަކު ޒަހަމްވެއްޖެއެވެ.
ރިޕޯތްތައް ބުނާ ގޮތުގައި މިއަދު ފަތިހު 6.0 މެގްނިޓިއުޑްގެ ބާރުގަދަ ބިންހެލުމެއް އައިސް، 29 މީހުންނަށް ވަނީ އަނިޔާވެފައެވެ. އެ ބިންހެލުމާއެކު، ސަރަހައްދުގައި ދިރިއުޅޭ ރައްޔިތުން ވަނީ އިމާރާތްތަކުން ބޭރަށް ނިކުމެ ރައްކާތެރިކަން ހޯދަން މަސައްކަތްކޮށްފައެވެ.
އިންޑޮނޭޝިއާގެ ކާރިސާ ހާލަތު ބެލެހެއްޓުމާ ބެހޭ އިދާރާ (ބީއެންޕީބީ) އިން ބުނި ގޮތުގައި، އެއް ކިލޯމީޓަރުގެ ތިލަ ފުންމިނުގައި އައި މި ބިންހެލުން ކުރިމަތިވީ ޕޯސޯ ރެޖެންސީއަށް ކަމަށާއި، ކައިރި ސަރަޙައްދުތަކުން ވެސް ބިންހެލުން އިހުސާސްކުރެވުނު ކަމަށެވެ.
ބިންހެލުމުގައި ދެ މީހަކަށް ސީރިއަސް އަނިޔާތަކެއް ލިބިފައިވާއިރު، އެ ދެ މީހުންނަށް މިހާރު ހޮސްޕިޓަލުގައި ފަރުވާދެމުންދާ ކަމަށް ރިޕޯޓްތައް ބުނެއެވެ. އޭގެ އިތުރުން، ފައްޅިއަކަށް ގެއްލުންވެފައިވާ ކަމަށް ރިޕޯޓްކޮށްފައިވާއިރު، އަލުން ބިނާކުރުމުގެ މަސައްކަތް ކުރަމުންދިޔަ އިތުރު ފައްޅިއެއްގެ ބައިތައް ވެއްޓި، ބަޔަކު ވަޅުލެވިފައިވާ ކަމަށްވެސް މައުލޫމާތު ލިބެއެވެ.
ޕޯސޯއިން ނަގާފައިވާ ވީޑިއޯއެއްގައި ދައްކާގޮތުން، ބިންހެލުން އައި ވަގުތު ފައްޅިއެއްގައި އަޅުކަން ކުރަމުން ދަނިކޮށް، ގަދައަށް ބިންހެލެން ފެށުމާއެކު، އެ މީހުން ވަނީ ކުއްލިއަކަށް ހަޅޭއްލަވަމުން ފިލުމަށް އެތަނުން ބޭރަށް ދުއްވައިގަނެފައެވެ.
އެ ބިންހެލުން އައިސްފައިމިވަނީ، ރަޝިއާގެ އިރުމަތީ ބިތަށް ބާރުގަދަ 8.8 މެގްނިޓިއުޑްގެ ބިންހެލުމެއް އައިސް، ޖަޕާނާއި ހަވާއީއަށް އަދި އެމެރިކާގެ ހުޅަނގު އައްސޭރިއަށް ސުނާމީގެ ރާޅުތައް ދިއުމުގެ ނުރައްކާ ކުރިމަތިވިތާ އެއް މަސް ފަހުންނެވެ. އެއީ މިހާތަނަށް ރެކޯޑްކުރެވިފައިވާ އެންމެ ބާރުގަދަ ބިންހެލުންތަކުގެ ތެރެއިން އެއް ބިންހެލުމެވެ. އެ ބިންހެލުމާ ގުޅިގެން، ޗައިނާ، ފިލިޕީންސް، އިންޑޮނޭޝިއާ، ނިއުޒީލެންޑް އަދި ޕެރޫ، ޗިލީ އަދި މެކްސިކޯ ފަދަ ދުރުގެ ގައުމުތަކަށް ވެސް ސުނާމީގެ އިންޒާރު ނެރެފައިވެއެވެ.
އިންޑޮނޭޝިއާއަށް އައި މި ބިންހެލުމާ ގުޅިގެން ސުނާމީގެ އެއްވެސް އިންޒާރެއް އަދި ނެރެފައެއް ނުވެއެވެ.
އިންޑޮނޭޝިއާ އޮންނަނީ “ޕެސިފިކް ރިންގް އޮފް ފަޔާ” ގެ ތެރޭގައެވެ. މިއީ ބިންގަނޑުގެ ތަފާތު އަދި ގިނަ އަދަދެއްގެ ބިންހެލުންތަކާއި އަލިފާން ފަރުބަދަތައް ހަރަކާތްތެރި ސަރަޙައްދެކެވެ.
2022 ވަނަ އަހަރު އިންޑޮނޭޝިއާއަށް އައި އެންމެ ގަދަ އަދި ގެއްލުން ބޮޑު އެއް ބިންހެލުމުގައި 600 އަށްވުރެ ގިނަ މީހުން މަރުވިއެވެ. އެއީ ވެސްޓް ޖާވާގެ ސިއަންޖޫރު ޓައުންއަށް އައި 5.6 މެގްނިޓިއުޑްގެ ބިންހެލުމެކެވެ. އެ ބިންހެލުމުގައި 7,729 އަށް ވުރެ ގިނަ މީހުންނަށް އަނިޔާވެ، އެތައް ބަޔަކު މިހާތަނަށް ވެސް ހޯދިފައެއް ނުވެއެވެ. އަދި، ސިއަންޖޫރު ރެޖެންސީގެ 16 ހިސާބަކަށް އަދި ކައިރި ހިސާބުތަކުން 62,628 އަށް ވުރެ ގިނަ ގެއަށް ގެއްލުންވެފައިވެއެވެ.
